Diamante de sangue

Esta película non é que me interesara moito moito, pero si que tiña certa curiosidade por vela dende hai algún tempo. A razón é que, nalgún centro de ensino que coñezo, algún profesor a proxecta como exemplo de bo cine comprometido con causas sociais. Neste caso fala da financiación de conflitos bélicos interesados en países de África para aproveitarse dos seus recursos naturais, por exemplo, dos diamantes de Serra Leoa.

"Diamante de sangue" foi dirixida en 2006 por Edward Zwick, e os papeis principais do elenco foron para Djimon Hounsou, Leonardo DiCaprio, Jennifer Connelly, Arnold Vosloo e David Harewood.

Solomon Vandy é un pescador de Serra Leoa que ve trastornada completamente a súa vida cando o grupo guerrilleiro que está participando na guerra civil do seu país, que tivo lugar basicamente na década dos 90, aparece na súa aldea. Levan ao resto da súa familia para campos de refuxiados e ao fillo maior, Dia, que quería ser médico, convérteno nun novo neno da guerra. A el cólleno para traballar nas minas de diamantes da zona. A partires dese intre intenta fuxir da mina e xuntarse de novo coa súa familia, pero é case imposible. Un día atopa un diamante dun tamaño e características excepcionais, e intenta escondelo, pero no último momento, un malvado vixilante da mina descúbreo, pero nese momento sufren un ataque.

Aparece en escena Danny Archer, un branco traficante de diamantes, orixinario de Zimbabwe, e Maddy Bowen, unha xornalista estadounidense que intenta escribir un artigo que descubra que os empresarios máis ricos do mundo relacionados cos diamantes son perfectamente coñecedores de que están axudando á persistencia da guerra civil.

Coñecen a Solomon e intentan axudalo, aínda que por razóns diferentes. Danny intenta vender ese gran diamante para retirarse por fin. Obviamente, os propósitos de Maddy son moito máis nobres. Solomon só descubrirá onde agochou o diamante cando lle devolvan á súa familia, e o máis difícil é recuperar a Dia, que leva tempo cos guerrilleiros e da man daquel malvado vixilante que viu ao seu pai esconder o diamante. Xa non é o mesmo rapaz.

Saúdos.