Spotlight

Oíra falar moi ben desta película, que reivindica unha vez máis o papel do bo xornalismo, que cada vez menos queda. Como trata sobre escándalos de pederastia na diócese de Boston durante o final do século XX, pensei que tería virulenta resposta por parte da Igrexa, pero parece que non, está ben considerada por eles, e agradecen o traballo honesto dos xornalistas que desvelaron eses abusos.

A película foi dirixida por Tom McCarthy en 2015. O elenco é moi coral e o único actor moi coñecido é Michael Keaton. A min tamén me soaba algo Rachel McAdams, pero sobre todo porque a vin noutra película hai un par de meses. Pero tamén hai que destacar a Mark Ruffalo, Brian D'Arcy James, Liev Schreiber, John Slattery ou Stanley Tucci. Algunhas desas caras soábanme, pero aínda non sei de que.

A película trata sobre o tema que xa desvelei antes. Pero non é detalle menor dicir que o título "Spotlight" (en España o conservaron, en Hispanoamérica decidiron cambialo por "En primeira plana") fai referencia ao nome da unidade de investigación do Boston Globe, polo visto a máis antiga de Estados Unidos. Ou sexa, catro ou cinco xornalistas que teñen unha pequena redacción no soto do edificio, e que non traballan con présas, senón que se dedican a investigar durante meses. E este pequeno equipo vese espoleado cando chega un novo director dende Miami, algo novato e no que non teñen demasiada confianza inicialmente, e lles pide que sigan investigando sobre unha columna que leu hai algún tempo, e que lle chamou a atención. Esa columna falaba sobre un sacerdote que podía ter cometido actos de pederastia na súa parroquia, e el pensaba que o tema podía dar de sí.

O equipo ponse a investigar, aparentemente sen moita paixón, pero segundo van entrevistando a persoas, van descubrindo que o escándalo é moito máis grave do que pensaban. E sobre todo, que o bispo de Boston estaba perfectamente informado, pero non estaba actuando e estaba facendo todo o posible por ocultalo. Obviamente, hai momentos de tensión no equipo, porque chegados a un determinado punto, uns pensan que hai que desvelalo xa, e outros opinan que hai que investigar un pouco máis para poder desmontar todo o sistema e acusar aos culpables.

Ao final, acaba sendo portada do xornal, comezan a recibir centos de chamadas de máis casos que aínda non coñecían, e o bispo é enviado a un cargo honorífico na curia romana. En calquera caso, xa digo que tanto a Igrexa estadounidense como a vaticana acabaron falando ben da película e agradecendo o labor honesto e profesional dos xornalistas para desvelar este escándalo. Tamén estaría ben dicir que a investigación tivo lugar a comezos deste século e milenio, e que se viu interrompida temporalmente polos atentados de Nova Iork do ano 2001.

Saúdos.